كان يا مكان فى سالف العصر و الزمان

فيه 3 قطط قط اسود عجوز و قط رمادى غلبان و صاحبهم التالت كان قط برتقالى ضعيف

المهم و هما ماشين فى الطريق لقو حته جبنه كبيرة

القط العجوز قال انا اللى لقتها الاول انا اللى من حقى اكلها انا عجوز و قربت اموت و انتو قدامكم فرصة تلاقو جبنة غيرها

رد عليه القط الضعيف قالوه انا لسة صغير و عيان و عاوز حتة الجبنة ليا عشان اكلها يمكن اخف و اقدر ادورلكم على جبنة تانية غيرها

القط الغلبان قال انا قط فقير و صاحبى على قد حاله مش عنده غير اكل قليل و دية اول مرة الاقى جبنة انا اولى بيها أكل بيها عيالى و لما ياكلو اوعدكم هدور ليكم على جبنة غيرها

و من هنا بداء الخلاف بين القطط التلاته مين اللى ياخد الجبنة اللى عجوز و مش قادر نفسه يجرب الجبنة و اللى عيان و تعب من الضرب و الحبس و اللى غلبان خايف على اكل العيال

المهم و هما قاعدين متخانقين طلع عليهم قرد مكار و قالهم انا ممكن احل المشكلة و احمى حتة الجبنة دية القطط التلاته قالو ليه ازاى قالهم انا هقسمها بينكم ايه رأيكم ؟

القطط التلاته وافقو بس القرد المكار قالهم تحبو اقسمها زاى ؟

القط العجوز قال الاكبر فى السن هو اللى ياخد اكتر

اما القط الغلبان قال اللى معاه بيت اكبر ياخد اقل

القط العيان قال اللى صحته اقوى من التانى ياخد اقل

المهم اختلفو راح القرد مطلع من شنطته ميزان و قالهم انا هقسم بينكم بالعدل  رد القط العجوز بس الميزان ليه كفتين  و احنا تلات قطط قالهم انا عامل حسابى المهم طلع سكينة و قطع الجبنة حتتين و حطهم فى الميزان ووزن لقى كفة اعلى من كفة راح واخد من الكفة الزيادة واكلها قالهم عشان متتخانقوش انا بساعدكم و بحميكم

المهم فضل يعمل كده من كفة لكفة لحد ما اتزنت الكفتين

قالهم دول نصين قد بعض تمام ايه رأيكم مين ياخد النص ده و مين النص التانى و مين ما ياخدش

و اختلفو تانى مع بعضهم و كل قط بقى زعلان و فى اخد جمب من القط التانى

قالهم انا عندى حل ايه رأيكم ناخد من كل نص حته للقطة التالته و وافق القطط التلاته لكنهم ما فضلوش اصحاب

المهم القرد قطع حته من النص ده و حته من النص ده

و حط الحتتين فى كفة و حط نص من النصين فى كفة و وزنهم و كالعادة اخد من الكفة الزيادة يا كلها مع انه فى البداية قالهم انا مش طمعان فى الجبنة و الجبنة دية حقكم الشرعى لانكم لقيتوها

المهم قعد يعمل كده لحد ما اتزنت الكفتين و بعد كده راح شايل الجبنة من كفة و حط النص التانى يوزنه و فضل ياخد منهم و فضل يشيل و يحط لحد اما فضل تلات فتافيت صغيريين

قالهم عشان متختلفوش عليهم راح واكلهم

القطط التلاته فهمو ان القرد ضحك عليهم و سرق جبنتهم قررو التلاته يتصالحو و يتحدو ضد القرد

القرد فكر بسرعة و قالهم انا مكانش قصدى انا هعوض عليكم ده انا هدلكم على مصنع جبنة كبير جدا لكن مش هينفع اقول الطريق غير للقط الاقوى لانه هيقابل مصاعب كتير و حرامية ممكن يحاولو يعرفو طريق المصنع بتاع الجبنة

القطط التلاته قالو بصوت واحد بس مين فينا الاقوى ؟

القرد قالهم ممكن نعمل مصارعة هنا القط العجوز صرخ بكل طاقته فووووووقو ده بيخدعكم عشان يهرب من العقاب و وسط ما هما محتارين يصدقو القط العجوز ولا يضربو بعضيهم القرد هرب بعد ما اكل الجبنة كلها و هو بيضحك فى سره

انا اللى اكلت الجبنة

و هنا خلصت الحدوتة و نصيحتى ليكم يا مصريين فوقو قبل ما القرد ياكل الجبنة بتاعتكم